الفتق الاربي عند البنات

لو لسه فيه أمهات معتقده ان الفتق الاربي عند الأطفال مرتبط بس بالولاد ، فخلينى اقولك ان ده مش صح الفتق الاربي ممكن يحصل للبنات كمان

عشان كده حبينا نشرح النهارده كل ما يخص الفتق الاربي عند البنات ، ونوضح معلومات كتير جدا ممكن الامهات يكونوا فهمينها غلط   .

تعالوا في البدايه نعرف مع بعض ، ايه هو الفتق الاربي عند البنات ..

الفتق الاربي عموماً : هو عبارة عن اختلاف خلقي في الاطفال وحديثي الولاده بيظهر على هيئة ورم او كولكيعه في منطقة ما بين اسفل البطن واعلى الفخذ واللي بنسميها “المنطقة الاربية ” ، وتقدر اي ام تلاحظه بوضوح عند الطفل في أوقات العياط والكحة والحزق والعطس ، لانهبيظهر فى الوقت ده ، و بيختفي بمجرد هدوء الطفل وراحته وفي اوقات نومه ، وظهور واختفاء كيس الفتق بيعكسلنا انه بيدخل ويخرج من والى تجويف البطن .

وبنلاحظ ان نسبة كبيرة من المصابين بالفتق الاربي من الاطفال بيكونوا ولاد ، وده لان نسبة حدوث الفتق الاربي في الولاد : البنات ، هي تقريبا نسبة من 8 : 1 يعني نقدر نقول ان الولاد عُرضه للاصابة بالفتق الاربي بنسبة 8 أضعاف البنات .

والسبب بيتلخص في التشريح التناسلي للجنين اثناء فترة نموه ، بمعنى ان عرض القناة الاربية عند الولاد أوسع من عرض القناة الاربية عند البنات وده باختصار سبب حدوث الفتق الاربي عند الولاد بالنسبة الكبيرة دي .

وده هينقلنا لنقطة مهمه جدا وهيخلينا نتكلم اكتر عن القناة الاربية ، ووظيفتها اثناء نمو الجنين ..
واللي كتير من الاهل ميعرفهوش ان في الشهر السابع من تكوين الجنين”البنت” بيبدأ ينزل في القناة الاربية عندها حاجة اسمها ” رباط الرحم المستدير ” وده اللي بيربط بين الرحم وبين الشفرتين الخارجيتين للمهبل عند البنت ، ولكن بعد نزول رباط الرحم المستدير لمكانه الطبيعي المفروض ان فتحة القناه الاربية تتقفل تلقائي ولوحدها ، لانها لو مقفلتش وفضلت مفتوحه هيخرج من الفتحة دي جزء من الامعاء او المبيض وقناة فالوب واحيانا المثانه ، وده اللي بنسميه الفتق الاربي عند البنات .

وللعلم … ان 1/3 الحالات المصابة بالفتق الاربي بنقدر نكتشفها قبل سن 6 شهور ، ومن بين كل الحالات غالبا بيحصل الفتق الاربي على الناحية اليمين بشكل اكبر من الناحية الشمال ، يعني تقريبا 60% من المصابين بالفتق الاربي بيكون عندهم على الناحية اليمين ، 30% منهم بيكون كيس الفتق الاربي عندهم على الناحية الشمال ، وبنسبة 10 % بس بيكون عندهم فتق اربي مزدوج على الناحيتين.

بكده نكون عرفنا مع بعض ايه هو الفتق الاربي وايه هي اسبابه ، ودلوقتي هنتكلم عن نقطه مهمه جدا وهي ….

خطورة الفتق الاربي عند البنات

الفتق الاربي عند الاطفال البنات بتظهر خطورته بشكل كبير جدا لو حصله اختناق ، والورطة الاكبر ان اختناق الفتق الاربي مستحيل ان فيه حد يقدر يتوقع ممكن يحصل امتى ، و اختناق الفتق معناه بأختصار ان الورم اللي في المنطقة الاربية بدأ يكبر اكتر ويتصلب اكتر ونحس انه بقى متحجر جدا لو لمسناه ، ده غير ان الطفل بيكون عنده مغص وترجيع بشكل مستمر ، وده بسبب ان فتحة القناة الاربية ضاقت على كيس الفتق ومبقاش عارف يدخل ويخرج من و الي البطن زي الاول ، وساعتها بيكون قدامنا 6 ساعات بالكتير اوي عشان نقدر ننقذ حياة الطفله من ان يحصلها

1 – اختناق للأمعاء او انسداد معوي : وده بيحصل بسبب ضغط كيس الفتق على أجزاء الامعاء المختنقه ، وبالتالي هيقطع امدادات الدم عنها فمش هيوصلها دم , وبعد 3 ساعات هتموت انسجة الامعاء دي وهيحصلها غرغرينا ، وفي وقت قليل جدا بتكون حالة طارئة لازم نستأصل الجزء ده من الامعاء .

2 – اختناق وضمور المبيض : من خطورة الفتق الاربي عند البنات ان اللي بينزل في كيس الفتق الاربي بنسبة 80 % بيكون المبيض وقناة فالوب ، وده اللي بيصعب من المضاعفات والخطورة لو حصل للفتق الاربي اختناق ، لانه بعد 6 ساعات بس هيحصل ضمور وغرغرينا في المبيض و قناة فالوب ، وده هيخلينا نضطر نستأصلهم وكمان جزء من ، وده للاسف هيأثر على الحياة الانجابية للطفلة فيما بعد وفرصة خصوبتها .

3 – ولو حصل وعدى وقت كبير على اختناق الفتق الاربي عند الطفلة ، وبعد موت الانسجة دي وضمورها ، ده هيسبب اطلاق للسموم في الجسم وتدريجيا هينتهي بتسمم دموي عند الطفلة ولا قدر الله حياتها بتكون في خطر وكمان عُرضه للوفاه .

وعشان نحمي اطفالنا من كل المضاعفات والخطورة دي ، لازم فورا اول م نكتشف ان الطفلة مصابة بالفتق الاربي نبدأ في رحلة علاجها ، وعشان العلاج الوحيد للفتق الاربي عند الاطفال هو عملية جراحية وفي اسرع وقت ، ف احنا لازم نبدأ في تجهيزات وترتيبات العملية ولكن الاهم انها تكون مع جراح أطفال متخصص

رسالة لكل ام …

اهتمامك بطفلتك بيحميها من اي مضاعفات او خطورة ، عشان كده اول ما تلاحظي ان الطفلة بتعيط او بتكح اتأكدي ان مفيش عندها ورم في المنطقة الاربية ، ولو لا قدر الله لاحظتي وجود ورم في المنطقة دي لازم تتوجهي فورا لاقرب دكتور جراحة اطفال ، واطمني لان عملية الفتق الاربي عملية سهلة وبسيطة جدا وانقاذ لحياة طفلتك

كمان متتردديش تتواصلي معانا لو لسه عندك اي استفسار