الفتق الاربي عند البنات

لو لسه فيه أمهات معتقده ان الفتق الاربي عند الأطفال مرتبط بس بالولاد ، فخلينى اقولك ان ده مش صح الفتق الاربي ممكن يحصل للبنات كمان

عشان كده حبينا نشرح النهارده كل ما يخص الفتق الاربي عند البنات ، ونوضح معلومات كتير جدا ممكن الامهات يكونوا فهمينها غلط   .

تعالوا في البدايه نعرف مع بعض ، ما هو الفتق الإربي عند البنات ..

ما هو الفتق الإربي؟

الفتق الأربي عبارة عن ورم أو بروز في منطقة ما بين أسفل البطن وأعلى الفخذ، وبنسميها “المنطقة الاربية ”

هل الفتق الإربي عند البنات شائع؟

بنلاحظ إن نسبة كبيرة من المصابين بالفتق الإربي عند حديثي الولادة بيكونوا ذكور، لأن نسبة حدوث الفتق الأربي في الذكور : البنات ، هي تقريبا نسبة من 8 : 1 يعني نقدر نقول ان الولاد عُرضه للإصابة بالفتق الإربي بنسبة 8 أضعاف البنات .

والسبب بيتلخص في التشريح التناسلي للجنين أثناء فترة نموه ، بمعنى ان عرض القناة الاربية عند الولاد أوسع من عرض القناة الاربية عند البنات وده باختصار سبب حدوث الفتق الاربي عند الولاد بالنسبة الكبيرة دي .

إزاي بيحصل الفتق الإربي عند البنات؟

ده هينقلنا لنقطة مهمة جدا وهيخلينا نتكلم أكتر عن القناة الأربية ، ووظيفتها أثناء نمو الجنين ..

واللي كتير من الاهل ميعرفهوش ان في الشهر السابع من تكوين الجنين”البنت” بيبدأ ينزل في القناة الاربية عندها حاجة اسمها ” رباط الرحم المستدير ” وده اللي بيربط بين الرحم وبين الشفرتين الخارجيتين للمهبل عند البنت. 

ولكن بعد نزول رباط الرحم المستدير لمكانه الطبيعي المفروض ان فتحة القناة الاربية تتقفل تلقائي ولوحدها ، لانها لو مقفلتش وفضلت مفتوحه هيخرج من الفتحة دي جزء من الامعاء او المبيض وقناة فالوب واحيانا المثانه ، وده اللي بنسميه الفتق الاربي عند البنات .

متى تظهر أعراض الفتق الإربي عند البنات؟

وللعلم … ان 1/3 الحالات المصابة بالفتق الاربي بنقدر نكتشفها قبل سن 6 شهور ، ومن بين كل الحالات غالبا بيحصل الفتق الاربي على الناحية اليمين بشكل اكبر من الناحية الشمال ، يعني تقريبا 60% من المصابين بالفتق الاربي بيكون عندهم على الناحية اليمين ، 30% منهم بيكون كيس الفتق الاربي عندهم على الناحية الشمال ، وبنسبة 10 % بس بيكون عندهم فتق اربي مزدوج على الناحيتين.

أعراض الفتق الإربي عند البنات

تظهر أعراض الفتق الإربي عند حديثي الولادة من البنات في صورة تقدر الأم تلاحظها  بوضوح في أوقات البكاء والكحة والحزق والعطس، لأنه بيظهر فى الوقت ده، ويختفي بمجرد هدوء الطفل وراحته وفي أوقات نومه، وظهور واختفاء كيس الفتق معناه أنه بيدخل ويخرج من والى تجويف البطن.

بكده نكون عرفنا مع بعض ايه هو الفتق الاربي وايه هي اسبابه ، ودلوقتي هنتكلم عن نقطه مهمه جدا وهي ….

خطورة الفتق الاربي عند البنات

الفتق الإربي عند البنات بتظهر خطورته بشكل كبير جدا لو حصله اختناق، والورطة الاكبر ان اختناق الفتق الاربي صعب نعرف هيحصل امتى، و اختناق الفتق معناه بأختصار إن الورم اللي في المنطقة الاربية بدأ يكبر اكتر ويتصلب اكتر ونحس انه بقى متحجر جدا لو لمسناه.

ده غير ان الطفل بيكون عنده مغص وترجيع بشكل مستمر ، وده بسبب ان فتحة القناة الاربية ضاقت على كيس الفتق ومبقاش عارف يدخل ويخرج من وإلى البطن زي الاول ، وساعتها بيكون قدامنا 6 ساعات بالكتير اوي عشان نقدر ننقذ حياة الطفلة من ان يحصلها واحدة من مضاعفات الفتق الإربي

مضاعفات الفتق الإربي عند البنات

إهمال علاج الفتق الإربي عند البنات ممكن يعرضها لهذه المضاعفات:

• اختناق للأمعاء او انسداد معوي : وده بيحصل بسبب ضغط كيس الفتق على أجزاء الامعاء المختنقه ، وبالتالي هيقطع إمدادات الدم عنها فمش هيوصلها دم , وبعد 3 ساعات هتموت أنسجة الأمعاء دي وهيحصلها غرغرينا ، وفي وقت قليل جدا بتكون حالة طارئة لازم نستأصل الجزء ده من الامعاء .
• اختناق وضمور المبيض : من خطورة الفتق الاربي عند البنات ان اللي بينزل في كيس الفتق الإربي بنسبة 80 % بيكون المبيض وقناة فالوب ، وده اللي بيصعب من المضاعفات والخطورة لو حصل للفتق الاربي اختناق ، لأنه بعد 6 ساعات بس هيحصل ضمور وغرغرينا في المبيض و قناة فالوب ، وده هيخلينا نضطر نستأصلهم وكمان جزء من ، وده للاسف هيأثر على الحياة الانجابية للطفلة فيما بعد وفرصة خصوبتها .
• ولو حصل وعدى وقت كبير على اختناق الفتق الاربي عند الطفلة ، وبعد موت الانسجة دي وضمورها ، ده هيسبب اطلاق للسموم في الجسم وتدريجيا هينتهي بتسمم دموي عند الطفلة ولا قدر الله حياتها بتكون في خطر وكمان عُرضه للوفاه .

وعشان نحمي اطفالنا من كل المضاعفات والخطورة دي ، لازم فورا اول م نكتشف ان الطفلة مصابة بالفتق الاربي نبدأ في رحلة علاجها ، وعشان العلاج الوحيد للفتق الاربي عند الاطفال هو عملية جراحية وفي اسرع وقت ، ف احنا لازم نبدأ في تجهيزات وترتيبات العملية ولكن الاهم انها تكون مع جراح أطفال متخصص

رسالة لكل ام …

اهتمامك بطفلتك بيحميها من اي مضاعفات او خطورة ، عشان كده اول ما تلاحظي ان الطفلة بتعيط او بتكح اتأكدي ان مفيش عندها ورم في المنطقة الاربية ، ولو لا قدر الله لاحظتي وجود ورم في المنطقة دي لازم تتوجهي فورا لاقرب دكتور جراحة اطفال ، واطمني لان عملية الفتق الاربي عملية سهلة وبسيطة جدا وانقاذ لحياة طفلتك

كمان متتردديش تتواصلي مع الدكتور رضا القاضي عبر الارقام الموضحة على الموقع  لو لسه عندك اي استفسار