شكل الفتق الاربي عند الاطفال

زي ما فيه ثقافة عند كل الامهات ان لما طفلها يعيط بتجري بسرعه وتشوف ماله وتحاول تهديه وتلهيه خوفا عليه ، لازم بردو يكون عند كل ام ثقافة ان عياط الطفل ده او قلقه ممكن يكون عرض او اشارة خطر لمرض او اختلاف خلقي اغلب الامهات ممكن تكون متعرفش عنه حاجة…

عشان كده حبينا ننبه كل الامهات النهارده عن اختلاف خلقي اسمه” الفتق الاربي ” وشكله عند الطفل وازاي نعالجه قبل م يحصل اي ضرر للطفل لا قدر الله

تعالوا بينا نشرح مع بعض في الاول شكل الفتق الاربي عند الاطفال

مع عياط الطفل , وفي اوقات العطس او الكحة والحزق والصراخ ، فيه تقريبا 5 % من الاطفال بيظهرعندهم ورم او كولكيعه في منطقة ما بين اسفل البطن واعلى الفخد ودي بنسميها المنطقة الاربية  ، ولكن الورم او الكولكيعه دي بتبدأ تختفي لوحدها مع هدوء الطفل وراحته وفي اوقات نومه .. ومع الورم ده بيكون الطفل فاقد للشهية وعنده نقص في التركيز والوعي ودايما قلقان ومش مرتاح ..

وهنا لازم نوضح نقطة مهمة جدا اغلب الاهل فاهمينها غلط وهي ..
ان عياط الطفل او حزقه او الكحة والعطس او اي مجهود يقوم بيه الطفل عموما مش هما السبب ابدا في ان الطفل يجيله فتق اربي …
وكمان مش الجواز من الاقارب ، او اي ادوية اخدتها الأم في فترة حملها هي اللي سببت الفتق الاربي عند الطفل …

ولا سبب الفتق الاربي عند الاطفال ضعف في عضلات او جدار البطن ..

وده لان السبب الحقيقي للفتق الاربي الى الان ما زال مجهول ، وبنكتفي بس اننا نقول ان الفتق الاربي ده هو اختلاف خلقي حصل نتيجة لان القناة الاربية مقفلتش بعد نزول الخصيتين لمكانهم في كيس الصفن عند الولاد ، او نزول رباط الرحم المستدير عند البنات ، فبيخرج جزء من الامعاء من الفتحة دي في الولاد او المبيض وقناة فالوب في البنات ويتمركزو في المنطقة الاربية مكونين كيس الفتق الاربي عند الطفل .

وللعلم فرصة ان الفتق الاربي ده بيحصل عند الولاد بتكون  8 اضعاف البنات ، وبيحصل في الجنب اليمين بنسبة 3 اضعاف الجنب الشمال …

بكده نكون عرفنا ايه هو الفتق الاربي واتكلمنا سريعاً عن اسبابه …
السؤال هنا بقى .. المفروض نعمل ايه لما نكتشف ان الطفل عنده فتق اربي ؟!
لازم في الوقت ده نكشف على الطفل عند اقرب جراح اطفال ، وده لان الفتق الاربي ممكن ف اي لحظه يتحول لفتق اربي مختنق وساعتها بيكون فيه خطورة كبيرة اوي على الطفل .
والفتق الاربي المختنق ده لو حصل الطفل بيكون معرض انه يفقد جزء من امعاؤه ، او يفقد خصيته ، ولو بنت هتكون معرضه لفقدان المبيض او قناة فالوب او جزء من الرحم في خلال ساعات لا قدر الله ، وده معناها ان الفطل او الطفله فقدت جزء من خصوبتها وفرصتها في الانجاب .

عشان كده وحماية لاطفالنا لو لاحظنا الاعراض اللي فوق دي ، لازم منترددش لحظه واحده فى اننا نروح لاقرب جراح أطفال متخصص … ربنا يحفظ اطفالنا جميعا وداموا يا رب بصحة وسلامه