عملية الختان والاحليل السفلي

مش كل الاطفال حديثي الولاده ينفع اننا نطاهرهم ف شهورهم الاولى ، وده لان فيه اطفال بتتولد باختلافات خلقية ، وبيحتاجوا اننا نعملهم عملية جراحية في سن معين  ، وبنضطر اننا نأجل عملية الطهارة لحين اصلاح الاختلاف الخلقي ده ، ومن بين الاختلافات الخلقية اللي بتأجل عملية الطهارة هو مرض الاحليل السفلي عند الاطفال

والاحليل السفلي :

هو اختلاف خلقي بيصيب طفل واحد من كل 250 طفل ، ومعناه باختصار ان فتحة مجرى البول بتكون مش في مكانها الطبيعي ، وبتكون موجوده ف اي مكان تاني في العضو الذكري للطفل سواء ورا فتحة مجرى البول الطبيعية او في منتصف العضو الذكري او في اخر العضو الذكري بين الخصيتين او عند فتحة الشرج .

وفي الحالة دي بنحتاج اننا نعمل عملية جراحية لاصلاح الاحليل السفلي عند الطفل , و العمليه دي بنقدر اننا نعملها للطفل اول ما يوصل لعمر 6 شهور و لحد 18شهر  ، وفي الحالات البسيطة غالبا بتتم العملية ع مرة واحده ، اما ف الحالات المتقدمه من الاحليل السفلي بنضطر اننا نعمل العملية مرة واتنين وتلاته ، وده لاننا ف كل مرحلة بنعدل حاجه معينه ، فممكن نحتاج لمرحلة لتعديل فتحة مجرى البول ومرحلة لتعديل انحناء العضو الذكري والتالته لتعديل راس العضو الذكري ” الحشفة ”

وده اللي بيخلينا نحتاج جلدة الطهارة ف اصلاح وترقيع العضو الذكري ، عشان كده بننصح اي ام طفلها مصاب بالاحليل السفلي اننا لازم نأجل عملية الطهارة و نعملها مع عملية الاحليل السفلي

و ده لان جلدة الطهارة بتساعدنا بشكل كبير على تحقيق اهداف عملية الاحليل السفلي واللي هي …..

1 – عضو ذكري مفرود بدون اي انحناء او تقوس

2 – جلد سميك محاوط للعضو الذكري من كل الاتجاهات

3 – راس عضو ذكري شكلها مناسب وقريب جدا من اللي خلقه ربناا

4 – فتحة مجرى بول في مكانها الطبيعىي

5 – واخيرا اننا بنعمل عملية الطهارة مع عملية الاحليل السفلي ف مره واحده

في سؤال مهم هنا بقى ……. ولنفرض ان الطفل عمل عملية الطهارة قبل عملية الاحليل السفلي ، او عمل كذا مرحلة من عملية الاحليل السفلي ومبقاش عنده جلدة طهارة ، يا ترا ايه الحل هنا ؟

طبعا احنا لو سيبنا العضو الذكري كده من غير ترقيع او اصلاح ، هيفضل الطفل يعاني طول حياته من مشاكل تدفق البول بشكل غير طبيعي ” الناسور البولي ” ، وتقويس العضو الذكري ، والعقم ، وهيأثر ع قدرته الجنسية فيما بعد ، ده غير ان شكل العضو الذكري نفسه مبيكونش افضل حاجة ، وده هيأثر على نفسية الطفل بقية حياته  … ويحسسه بفقدان الثقة ف نفسه ، يعني باختصار مينفعش نعمل عملية الاحليل السفلي من غير ترقيع للجلد ، لان ده جماليا ووظيفيا هيأثر على حياة ونفسية الطفل ….. طيب يا ترا اي الحل ؟؟

الحل الوحيد اننا نستأصل جلدة من اللثة او الشفة الداخلية للطفل ، ونكمل بيها اصلاح الاحليل السفلي عند الطفل ، ومن حكمة ربنا سبحانه وتعالى ان الجلد ده بينمو ويتجدد تلقائيا بعد اسبوعين تقريبا بعد العملية

وبيبان الطفل انه مستأصلش جلد من اللثة نهائيا كأنه زيه زي اي طفل طبيعي .

خلاصة الموضوع ان اي طفل مولود بالاحليل السفلي مينفعش نعمله عملية الطهارة قبل عملية الاحليل السفلي لان ده هيعرضه لاستئصال جلد من اللثة عشان نحسن من وظيفة العضو ومظهره .